Beth yw hyn?
I ddechrau, rhaglen beilot 3 blynedd ar gyfer ieithoedd modern tramor mewn ysgolion cynradd yng Nghymru oedd y peilot yma, ond erbyn hyn, mae'r Peilot wedi cael ei estyn am 2 flynedd arall. Noddir y peilot gan Lywodraeth Cynulliad Cymru a chaiff ei gweithredu gan CILT Cymru - y Ganolfan Genedlaethol ar gyfer Ieithoedd yng Nghymru. Mae'r peilot yn rhan o strategaeth y Cynulliad 'Ieithoedd Sy'n Cyfrif' - sydd gyda'r bwriad o gynyddu dysgu ieithoedd ledled Cymru.

Beth yw bwriad y prosiect ITM yn gyffredinol?

• Rhoi cymorth i ysgolion sy'n dymuno addysgu iaith dramor yng Nghyfnod Allweddol 2
• I'r Cynulliad i greu cronfa o dystiolaeth ynghylch sut y gall addysgu a dysgu iaith dramor yn CA2 gyflenwi a chyfoethogi'r cwricwlwm cynradd a bod o fantais i ddisgyblion pan fyddant yn symud ymlaen i ysgol uwchradd
  

Pwy sydd yn rhan o'r Prosiect?
Roedd Cam 1 y prosiect yn cynnwys 22 o ysgolion uwchradd ledled Cymru a'r 105 o ysgolion cynradd sy'n eu bwydo. Mae Cam 2 yn cwblhau clystyrau anghyflawn yng Ngham 1, ac felly yn cynyddu'r effaith wrth newid i'r ysgol Uwchradd. Ar hyn o bryd, mae 118 o ysgolion cynradd yn rhan o'r Prosiect.

Mae'r Prosiect yn cynnig amrywiaeth o ieithoedd tramor modern a darpariaeth addysgu. Mae tua hanner o'r ysgolion yn ysgolion cyfrwng Cymraeg. Yn bennaf, mae'r Peilot yn cynnwys blynyddoedd 5 a 6, ond mae rhai clystyrau wedi mynd a'r dysgu i lawr i flwyddyn 4. Y brif iaith a ddewiswyd oedd Ffrangeg, ond mae hefyd enghreifftiau o Sbaeneg, Almaeneg ac Eidaleg.

Casglodd Cam 1 sail dystiolaeth gynhwysfawr o sut i gyflwyno ITM yng Nghyfnod Allweddol 2 ac edrychodd ar y manteision i'r cwricwlwm. Gwerthuswyd Cam 1 yn annibynnol ac roedd yr adroddiad yn galonogol iawn.

Bydd Cam 2 yn parhau i gefnogi'r sector cynradd, ond bydd yn pwysleisio mwy ar drefniadau Pontio a thracio disgyblion y Prosiect wrth iddyn nhw symud ymlaen drwy Gyfnod Allweddol 3. Ar ôl y peilot, pan fydd Llywodraeth Cynulliad Cymru wedi cael amser i ystyried yr holl ddarganfyddiadau, byddwn ni'n aros am benderfyniad ynglyn â dyfodol ieithoedd cynradd yng Nghymru.

Sut mae'n cael ei drefnu?
Mae ysgolion yn derbyn grant fach i'w galluogi nhw i weithio fel 'Clystyrau' e.e. un ysgol uwchradd yn gweithio'n agos gyda'r ysgolion cynradd cysylltiedig. Beth bynnag yw'r dull dosbarthu, mae clystyrau yn cydweithio ar raglen astudio a rhesymeg tu ôl i'r ddarpariaeth. Mae clystyrau yn penderfynu ar y trefniadau dysgu gorau iddyn nhw:

A. Athrawon uwchradd yn ymweld ag ysgolion cynradd i ddarparu gwersi wythnosol, gydag athrawon cynradd yn gwylio, atgyfnerthu a darparu cefnogaeth.

B. Athrawon cynradd gydag arbenigedd yn dysgu dosbarthiadau yn yr ysgol, gyda chymorth gan gydweithwyr Uwchradd.

C. Clystyrau yn cyflogi athro/athrawes bro i ddarparu gwersi iaith.

NEU bydd clystyrau yn cyflogi cymysgedd o'r 3 modelau

Mae clystyrau yn cyfarfod yn rheolaidd i arolygu datblygiad a chynllunio ar gyfer y dyfodol.
Mae athrawon yn rhannu arbenigedd unigol - cydweithwyr cynradd yn darparu methodoleg Cyfnod Allweddol 2, cydweithwyr Cyfnod Allweddol 3 yn darparu'r wybodaeth iaith arbennig.

Erbyn hyn, rydym wedi casglu tystiolaeth am 3 mlynedd i gynnig fod gan bob model ei fanteision ei hun. Roedd y darganfyddiadau yn yr Adroddiad Interim (2005) yn ofnadwy o bositif gan ddarganfod tystiolaeth gadarn o esiamplau i gefnogi'r amcanion a gynigwyd ar ddechrau'r Prosiect.

Beth yw amcanion y Prosiect?

• Gwneud dysgu ieithoedd tramor yn brofiad pleserus a buddiol i ddisgyblion
• Ennyn brwdfrydedd dros ieithoedd pan yn ifanc ac, ar yr un pryd, meithrin agweddau positif tuag at ddiwylliannau eraill.
• Datblygu sgiliau iaith a llythrennedd disgyblion wrth adeiladu ar natur ddwyieithog ysgolion cynradd yng Nghymru.
• Ysgogi disgyblion o bob gallu trwy ddefnyddio dulliau addysgu aml-synnwyr
• Meithrin cydweithrediad cynradd - uwchradd effeithiol a hyrwyddo synnwyr o bwrpas cyffredin trwy rannu arferion da
• Datblygu swyddogaeth yr athro dosbarth gyda golwg ar gynaladwyedd hirdymor y Prosiect.
  

• Mae dysgu ieithoedd yn hwyl ac yn ysgogol. Mae'n rhoi cyfle i fod yn chwareus
  a phenrhydd mewn amgylchedd cynradd diogel lle mae plant yn dysgu orau
• Mae plant ifanc yn awyddus i ddysgu ac yn barod i dderbyn gwybodaeth. Mae
  ganddynt chwilfrydedd naturiol a mwy o allu i amgyffred ieithoedd a syniadau
  newydd
• Mae'n cynnig cyd - destun newydd er mwyn datblygu sgiliau sy'n bodoli a
  gwneud y cysylltiad rhwng ieithoedd
• Mae'n gwella'r cyflawniad hirdymor mewn unrhyw iaith sy'n dilyn
• Mae'n atgyfnerthu syniad y plentyn o ramadeg a mân fanylion iaith - synau,
  rhythmau a chywair
• Mae angen ieithyddion ar ein heconomi.

Mae'r wybodaeth uchod ar gael fel taflen lliw mewn fformat pdf Gwybodaeth Prosiect Cyfnod Allweddol 2

Diweddarwyd ar: Hydref 6 2006 E-bost: carolyn.goodwin@ciltcymru.org.uk