Prosiect Peilot Cyfnod Allweddol 2 Ieithoedd Tramor Modern Cynulliad Cenedlaethol Cymru: Dathliad Clwstwr Ysgolion Cylch Tregaron

Ar y 10fed o Ebrill, 2008, mynychodd Jane Hutt, Gweinidog Cynulliad Cenedlaethol Cymru ar gyfer Plant, Addysg, Dysgu Gydol Oes a Sgiliau, dathliad o gyrhaeddiad clwstwr ysgolion Tregaron – yr ysgol Uwchradd a’i ysgolion cynradd cysylltiedig – sydd yn cymryd rhan yn y Prosiect Peilot Cenedlaethol i gyflwyno ieithoedd tramor mewn ysgolion cynradd.

Roedd y dathliad hwn yn cyd-fynd â dechrau gwerthusiad annibynnol o Gam 2 y Peilot yn ogystal â lansiad Fframwaith Anstatudol Ieithoedd Tramor Modern ar gyfer Cyfnod Allweddol 2, fel rhan o’r Cwricwlwm Cenedlaethol diwygiedig.

Roedd adroddiad annibynnol yn gwerthuso Cam 1 o’r Peilot yn hynod o bositif ac amlinellwyd bod cyflwyno iaith dramor modern yn rhan o’r cwricwlwm cynradd yn werthfawr ac yn gwneud cyfraniad pwysig i bontio disgyblion rhwng y cynradd a’r uwchradd. Ers hyn, mae’r Cynulliad Cenedlaethol wedi darparu cyllid ychwanegol, ar gyfer prosiectau tebyg mewn ysgolion sydd ddim yn rhan o’r Peilot, trwy’r Gronfa Ysgolion Gwell.