Ieithoedd Modern Addysg Uwch yng Nghymru : y sefyllfa ar hyn o bryd

Yng Nghymru, fel yng ngweddill y DU, mae Ieithoedd Modern ar lefel gradd prifysgol o dan fygythiad mewn rhai sefydliadau.

• Mae 8 Sefydliad Addysg Uwch (SAU) yn cynnig ieithoedd tramor modern i ryw lefel (Abertawe, Abertawe Fetropolitan, Aberystwyth, Bangor, Caerdydd, Llanbedr Pont Steffan, Morgannwg, UWIC).
• 6 yn unig (Abertawe, Aberystwyth, Bangor, Caerdydd, Llanbedr Pont Steffan ac UWIC) ar lefel gradd anrhydedd lawn a/neu ôl-radd.
• Mae Casnewydd a Phrifysgol Glyndŵr wedi rhoi’r gorau i ddysgu ieithoedd hyd at lefel gradd.

O ganlyniad i ddatganoli, fodd bynnag, mae gan Lywodraeth Cynulliad Cymru bwer dros Addysg Uwch o safbwynt addysgu a dysgu.

• Cyngor Cyllido Addysg Uwch Cymru (CCAUC), ar ran y Cynulliad, sy’n penderfynu lefelau cyllido ar gyfer dysgu’n gyffredinol ac ar gyfer categorïau pwnc unigol.

Cyrff ymreolus yw SAUau. Eto i gyd, trwy’r defnydd o gyllid, mentrau penodol ac arweiniad, mae’r Cynulliad a CCAUC yn ceisio cyflawni blaenoriaethau a datblygiadau neilltuol ar gyfer y sector yng Nghymru.

Bydd dyfodol astudiaeth o ieithoedd tramor ar lefel AU yn dibynnu ar gydweithio ar wahanol lefelau, mewn gwahanol rannau o’r gyfundrefn addysg. Mae CILT Cymru’n gweithio i dynnu SAUau Cymru ynghyd i’r gydymdrech honno.

Gyda’n cydweithwyr yn CILT Scotland, England a Northern Ireland, mae CILT Cymru’n ymwneud ag ymchwil ar lefel DU. Mae modd gweld crynodeb o brosiectau ymchwil y mae gan CILT ran ynddyn nhw trwy fynd at yr adran Research and consultation ar wefan CILT Lloegr..

Cynadleddau a Datblygiad Proffesiynol Parhaus

Mae CILT Cymru’n trefnu ystod eang o gyrsiau, gweithdai, diwrnodau adnoddau a digwyddiadau eraill, a bydd llawer ohonyn nhw o ddiddordeb i’r rheini yn y sector Addysg Uwch. Am ragor o wybodaeth ynghylch y digwyddiadau hyn ewch i'r dudalen Calendr Digwyddiadau.

Portffolio Ieithoedd Ewropeaidd

Cafodd yr European Language Portfolio (ELP) ar gyfer oedolion yn y DU, gan gynnwys y rheini mewn Addysg Uwch, ei ddatblygu gan yr hen Languages NTO gyda chefnogaeth CILT i gynnig ffordd ddeniadol a chludadwy a fyddai’n ysgogi’r dysgwr unigol ac yn ei helpu i gadw’r cofnod diweddaraf o’i brofiad/phrofiad gyda dysgu iaith ac i gadw golwg ar ei lefelau cyfnewidiol o berfformiad.

Cist Offer ar gyfer Lleoliadau Gwaith

Mae’r gist offer hon wedi ei llunio i helpu pobl ifanc sy’n mynd ar leoliadau gwaith yn y DU neu dramor i ddatblygu a chofnodi’r sgiliau cyfathrebu rhyngwladol a fydd yn eu helpu gyda’u gyrfa yn y dyfodol, ac i fod o gymorth i’r sawl sy’n gweithio gyda nhw i baratoi ar gyfer y lleoliad, i ymgymryd ag ef ac i arolygu’r profiad wedyn. Fe’i cynllunir i gael ei haddasu a’i defnyddio’n hyblyg, gan ddibynnu ar anghenion a sefyllfaoedd unigol. Mae’r gist offer yn cynnwys:

• Awgrymiadau ar gyfer

• Myfyrwyr (naill ai’r rheini sy’n mynd dramor ar leoliad neu’r rheini sy’n dilyn lleoliad iaith yn y DU)
• Cydlynwyr lleoliadau gwaith
• Athrawon iaith
• Cynghorwyr mewn cwmnïau (naill ai yn y DU neu dramor)

• Adran Adnoddau, sy’n mynegi ffynonellau gwybodaeth ddefnyddiol am ieithoedd, gwledydd a diwylliannau eraill.
• Fframwaith Dysgu Ieithoedd ar Leoliad Gwaith, yn amlinellu’r tasgiau y bydd rhywun yn debygol o ddod wyneb yn wyneb â nhw tra ar leoliad gwaith, a’r sgiliau ieithyddol a diwylliannol sydd eu hangen yn sgil hyn. Gall myfyrwyr a thiwtoriaid ddefnyddio hyn tra’n paratoi ar gyfer y lleoliad ac wrth asesu cynnydd wedyn. Mae hefyd yn rhywbeth y gall myfyrwyr gyfeirio ato drwy gydol eu lleoliad, i’w helpu i adnabod pa sgiliau a gwybodaeth y dylen nhw eu cryfhau, sut i wneud hyn, a sut i gofnodi eu cyflawniadau. Mae modd ei ddefnyddio yn ogystal ochr yn ochr â’r Portffolio Iaith Ewropeaidd: Fersiwn oedolion (fersiwn y DU).